گلگت: وین دریا میں گر نے سے 25 افراد جاں بحق

اسکردو: راولپنڈی سے اسکردو جانے والی مسافر وین دریا میں بہہ گئی، حادثے میں 25 افراد جاں بحق ہو گئے، وزیر اعلیٰ گلگت بلتستان نے وین دریا میں گرنے کے واقعے کی انکوائری کا حکم دے دیا۔

تفصیلات کے مطابق پیر کو راولپنڈی سے اسکردو جانے والی مسافر وین روندو کے قریب دریا میں گر گئی، جس سے پچیس افراد جاں بحق ہو گئے، ترجمان جی بی حکومت کا کہنا ہے کہ پاک آرمی کے ہیلی کاپٹر میں نکالی گئی لاشوں کو اسپتال منتقل کیا گیا۔

حادثے کا شکار ہونے والی وین میں 25 افراد سوار تھے، پولیس کا کہنا ہے کہ دریائے سندھ میں گری وین کا کچھ حصہ نظر آ رہا ہے، ترجمان گلگت بلتستان فیض اللہ فراق نے بتایا کہ پاک فوج کے تعاون سے ریسکیو آپریشن کیا گیا، روندو سول اسپتال میں ایمرجنسی بھی نافذ کی گئی۔

پولیس اور ریسکیو ذرایع کے مطابق اسکردو کے لیے پچیس مسافروں کو لے کر جانے والی مسافر کوسٹر بلتستان میں داخل ہوتے ہی حادثے کا شکار ہوئی، کوسٹر روندو میں موڑ کاٹتے ہوئے دریا میں گری، حادثے میں ڈرائیور بھی جاں بحق ہوا۔ ایس ایس پی اسکردو اسحاق حسین کے مطابق مسافروں کی لاشیں دریا سے نکالنے کے لئے امدادی کارروائیاں جاری ہیں، تاہم حادثے کے مقام پر دریا میں پانی کا بہاؤ تیز اور دریا کی گہرائی زیادہ ہونے کے باعث امدادی کاروائیوں میں مشکلات کا سامنا ہے۔

وزیر اعلیٰ گلگت بلتستان حافظ حفیظ الرحمان نے ٹریفک حادثے پر افسوس کا اظہار کرتے ہوئے انتظامیہ کو ریسکیو عمل مزید تیز کرنے کی ہدایت کر دی ہے۔

یاد رہے کہ گزشتہ روز بھی راولپنڈی سے آزاد کشمیر جاتے ہوئے ارجا کے مقام پر ایک مسافر بس نالے میں گر گئی تھی جس میں 10 افراد جاں بحق ہوئے اور 11 افراد زخمی ہوئے۔




اس خبر پر اپنی رائے کا اظہار کریں